प्रतिनिधिसभा विघटनपछि औपचारिक रूपमै दुई खेमामा विभाजित नेपाल कम्युनिस्ट पार्टी (नेकपा) का दुवै खेमा आन्तरिक समीक्षामा जुटेका छन्। बुधबार दुवै समूहको स्थायी समिति बैठक बसेको छ।
प्रधानमन्त्री केपी शर्मा ओली समूहको बैठक प्रधानमन्त्री निवास बालुवाटारमा र दाहाल–नेपाल खेमाको बैठक पेरिसडाँडास्थित पार्टी कार्यालयमा बसेको हो। दुवैतर्फका बैठकले कुनै निर्णय गरेन। दुवै पक्षको छलफल आ–आफ्ना अभियानका विषयमा केन्द्रित रह्यो।
ओली पक्षको बैठकले माथिल्लो तहका नेता मात्रै दाहाल–नेपाल खेमामा गएकाले संगठनात्मक क्षेत्रमा खास ठूलो क्षति नपुगेको निष्कर्ष निकालेको खबर आजको अन्नपूर्ण पोष्ट दैनिकले छापेको छ।
प्रधानमन्त्री ओलीले सबै नेता कार्यकर्तालाई निर्वाचन क्षेत्रसम्म पुग्ने गरी निर्वाचन कार्यक्रम र कार्ययोजना बनाउन निर्देशन गरेका छन्।
दाहाल–नेपाल पक्षले भने प्रतिनिधिसभा विघटनविरुद्धको आन्दोलन थप प्रभावकारी बनाउने विषयमा छलफल भएको स्थायी समिति सदस्य सुरेन्द्र पाण्डेले बताए। ‘आन्दोलनमा शिथिलता आएको हो कि भन्ने पनि परेको रहेछ, अबका विरोध कार्यक्रम थप प्रभावकारी हुनेछन्’, उनले भने।
