आइतबारको प्रतिनिधिसभाको सातौं अधिवेशनमा संसदमै प्रश्न उठ्यो- प्रधानमन्त्री केपी ओली अब कुन पार्टीको ?
प्रश्न सोध्ने ब्यक्ति थिए, तत्कालीन नेकपा एमालेका उपाध्यक्ष एवं हालका नेकपाका स्थायी समिति सदस्य भीम रावल । आफ्नै दलका सांसदले प्रधानमन्त्री ओलीलाइ तपाइ कुन पार्टीको भनेर प्रश्न सोध्नु अचम्मको विषय हो । नेकपाको १ सय ७४ जना सांसदको समर्थनमा सर्वसम्मत दलको नेता चयन भएर प्रधानमन्त्री भएका ओलीलाइ संसदमै त्यो पनि आफ्नै पार्टीको सांसदले तपाइ कुन पार्टीको भनेर प्रश्न सोध्ने दिन आउनु विडम्वना पूर्ण विषय हो ।
सर्वोच्च अदालतले आइतबार नै सत्तारुढ दल नेकपाको आधिकारिक नाम ऋषि कट्टेलले दर्ता गरेको नेकपालाइ दिएसँगै सत्तारुढ दल पार्टी विहिन अवस्थामा पुगेको हो । २०७५ जेठ ३ गते तत्कालीन नेकपा एमाले र माओवादी केन्द्रवीच एकता गरेर नेकपा बनाएको दावी गरेपनि सर्वोच्चले त्यो नाम कट्टेल नेतृत्वलाइ दिएसँगै पूर्व एमाले र माओवादी केन्द्रमा फर्किएको केही विश्लेषकले दाबी गरेका छन् । तर नेकपा बनेर एमालेका माओवादीतिर र माओवादीका एमालेतिर मिस्सिसकेको अवस्थामा त्यो तर्क र भनाइले पनि खासै अर्थ राख्ने देखिदैन ।
सर्वोच्चले राजनीतिक दल सम्वन्धी ऐन र संविधान अनुसार नेकपाको दाबी अनुसार कट्टेललाइ दिएको देखिन्छ । तर पार्टी एकीकरण गर्दै गर्दा १ बर्षभित्रमा महाधिवेशन गर्ने उद्घोष गर्ने प्रधानमन्त्री ओली र अध्यक्ष पुष्पकमल दाहालवीचको झगडाले दुबैको हातबाट नेकपा फुत्किएको छ । ३ बर्ष नपुग्दै आपसमा एकले अर्कालाइ दुस्मनजस्तै ब्यवहार गरेका ओली दाहाल अन्तत: दलविहिन जस्तै भएका छन् । संसदीय अभ्यासमा आफूले दाबी गरेको दल अर्कैले पाएपछि प्रधानमन्त्री कुन पार्टीको भन्ने प्रश्न उठ्नु स्वाभाविक नै हो । अझ रोचक कुरा त प्रधानमन्त्री कुन पार्टीको भनेर प्रश्न गर्ने अध्यक्ष दाहाल र सांसद भीम रावलको पनि पार्टी कुन हो ? भन्ने प्रश्न सर्वत्र उठेको छ ।
