सत्तारुढ दल नेकपा एमाले संसदको पहिलो पार्टीमात्रै होइन, ३ बर्षदेखि सरकारको नेतृत्व समेत गर्दै आएको छ । तर पछिल्लो समय प्रधानमन्त्री ओली समूहले एकलौटी रुपमा पदाधिकारी हटाएपछि माधवकुमार नेपाल तथा झलनाथ खनाल विच्चिएका छन् । दुवै पक्षले समानान्तर समिति गठन गर्दै राष्ट्रिय भेला समेत बोलाएपछि अब एमाले औपचारिक रुपमा विभाजनतर्फ उन्मुख भएको छ ।
शुक्रबार ओली समूहले नेपाल- खनाल समूहका पदाधिकारी धेरै भएपछि महासचिव बाहेक सबै पदाधिकारीलाइ हटाएपछि विवाद चुलिएको हो । शनिवार नेपाल- खनाल समूहको केन्द्रीय समितिको बैठकले ७ वटै प्रदेशमा इन्चार्ज र भातृ संस्थाको जिम्मेवारी तोकेसँगै समानान्तर समिति गठन भएका हुन् । त्यस्तै नेपाल- खनाल समूहले चैत्र ४ र ५ गते राष्ट्रिय भेला बोलाएसँगै एमालेभित्र झनै रडाको चर्केर जाने निश्चित छ ।
२०५५ सालमा फुटेको एमाले अब फेरि फुटको संघारमा पुगेको छ । सत्ता स्वार्थ र जनताको भावनालाइ आत्मसात गर्न नसक्दा सत्तारुढ दल एमालेमा घर झगडाको राँको दन्कदै गएको हो । निभाउने भूमिकामा रहेका बामदेव गौतम पनि ओलीले गलत काम गरेको भन्दै नेपाल खनाल समूहमा देखिएपछि एमालेभित्रको विवाद उग्र बन्दै गएको हो । अब २ वटै समूहको प्रदेश इन्चार्जको जिम्मेवारी भएसँगै प्रदेशदेखि जिल्ला हुदै स्थानीय तहसम्म दैनिक झगडा र विवाद बढ्दै जानेछ ।
संसारकै मजदुर एक हौं र कम्युनिष्टहरु मिल्नुको विकल्प छैन भनेर नथाक्नेहरु नै आफैंभित्र फुट र विभाजनले जनताको मतको अपमान गरिरहेका छन् । जनताले तत्कालीन एमाले र माओवादी केन्द्र मिलेर नेकपा बन्ने उद्घोष गर्दै २०७४ सालको निर्वाचनमा कार्यगत एकतालाइ विश्वास गरेर मत दिएपछि त्यो मतको पुरै अपमान कम्युनिष्ट पार्टीहरुले गरिरहेका छन् । हुदाँ हुदाँ एमालेभित्र दन्किएको आगोको ज्वाला कहाँ सम्म पुग्ने हो भन्ने अहिले अनुमान लगाउन कठिन छ ।
