प्रधानमन्त्री केपी ओलीले शनिवार दिनको ११ आफ्नै निवास बालुवाटारमा सर्वदलीय बैठक बोलाए । बैठकमा प्रमुख प्रतिपक्ष कांग्रेस सभापति शेरबहादुर देउवा, जसपाका नेता, संसदमा प्रतिनिधित्व गर्ने दल तथा साना दलहरुको सहभागीता थियो । पछिल्लो राजनीतिक अवस्था र कोरोनाको दोस्रो कहरको बारेमा बैठक बोलाइएको प्रधानमन्त्री कार्यालयले जनाएको छ ।
तर बैठक यत्तिमा मात्रै सीमित छैन । सरकार र प्रधानमन्त्री ओलीको पार्टीको नेतृत्व विरुद्ध केन्द्रदेखि प्रदेश सरकारसम्म विपक्ष दलहरुको गठजोर र सरकारबाट हटाउने खेल भैइरहेको छ । प्रधानमन्त्री ओली विरुद्ध जुनसुकै बेला अविश्वासको प्रस्ताव आउने खतरा उत्तिकै छ । कर्णाली प्रदेशमा आफ्नै दलका ४ जना सांसदले ‘फ्लोर क्रस’ गरेर माओवादी केन्द्रका मुख्यमन्त्री महेन्द्रबहादुर शाहीलाइ समर्थन गरेपछी आफ्नै दलले ल्याएको अविश्वासको प्रस्ताव फेल भएको छ । यो भर्खर सुरुवात मात्रै भएकोले अन्य प्रदेश सभामा र प्रतिनिधिमा पनि एमाले सांसदबाटै फ्लोर क्रस हुने सम्भावना छ । नेपालकै संसदीय इतिहासमा आफ्नै दलभित्रका सांसदलाइ विश्वास लिन नसक्नु र फ्लो क्रस हुने अवस्था आउने पहिलो घटना हो । यसको सुरुवात नेकपा एमालेबाट भएको छ ।
कोरोनाको कहर र दोस्रो चरणको सम्भावित समस्यालाइ देखाएर सरकारले प्रतिनिधिसभा अधिवेशन अन्त्य गर्ने तयारी गरेको छ । यसको लागि अपजस नआयोस् भनेर ओलीले सर्वदलीय बैठक डाकेर यसबारे छलफल गर्न लागेका हुन् ।
माओवादी केन्द्रको बहिष्कार
प्रधानमन्त्री ओलीले डाकेको सर्वदलीय बैठक माओवादी केन्द्रले बहिष्कार गरेको छ । प्रधानमन्त्री ओलीले माओवादीका अध्यक्ष पुष्पकमल दाहाललाइ टेलिफोन सम्वाद गर्दै बैठकको लागि निम्तो दिएका थिए । तर माओवादीले सिहदरबारमा बैठक बोलाउन छोडेर बालुवाटारमा बोलाएको र ओलीको निहित स्वार्थ पूरा गर्न किन जाने भन्दै नजाने निर्णय गरेको दाहाललका प्रेस सल्लाहकार विष्णु सापकोटाले जानकारी दिए । सम्भवत प्रधानमन्त्रीले डाकेको बैठक बहिष्कार माओवादी केन्द्रले पहिलो पटक गरेको हो ।
बैठकमा माओवादी केन्द्रको अलवा एमालेकै माधव नेपाल र झलनाथ खनाल समूहले पनि बैठक बहिष्कार गरेको छ । त्यस्तै जसपाका संघीय परिषदका अध्यक्ष डा बाबुराम भट्टराइ र अध्यक्ष उपेन्द्र यादव पनि बैठकमा सहभागी भएनन् ।
