तमिलनाडुको नीलगिरी जिल्लामा बुधबार एउटा ठूलो दुर्घटना भएको छ । समाचार एजेन्सी एएनआईका अनुसार, सीडीएस बिपिन रावत, उनका कर्मचारी र परिवारका केही सदस्यहरू एमआई सिरीजको हेलिकप्टरमा सवार थिए । जुन तमिलनाडुको कोइम्बटूर र सुलुरको बीचमा दुर्घटनाग्रस्त भएको हो । खोज तथा उद्धार कार्य सुरु गरिएको छ ।
एजेन्सीलेका अनुसार हेलिकप्टरमा सेना प्रमुख जनरल विपिन रावत, उनकी पत्नी, रक्षा सहायक, सुरक्षा कमान्डो र वायुसेनाका पाइलटहरू सहित कुल १४ जना सवार थिए ।
आर्मीको एमआई–१७ हेलिकप्टर दुर्घटना भएको हो । घना जंगलमा भएको यो दुर्घटनापछि हेलिकप्टरमा आगो लागेको थियो । हालसम्म नराम्ररी जलेका ४ जनाको शव निकालिएको छ ।
दुर्घटना भएको करिब एक घण्टापछि जनरल रावतलाई अस्पताल लगिएको जानकारी दिए पनि उनको अवस्थाबारे आधिकारिक धारणा सार्वजनिक गरिएको छैन् ।
यस दुर्घटनाको बारेमा प्रधानमन्त्री नरेन्द्र मोदीलाई जानकारी दिइएको छ । रक्षामन्त्री राजनाथ सिंहले केही समयपछि संसदमा दुर्घटनाबारे बयान दिनेछन् । जनरल विपिन रावतले ३१ डिसेम्बर २०१६ देखि ३१ डिसेम्बर २०१९ सम्म सेना प्रमुखको रूपमा सेवा गरेका थिए । उनले १ जनवरी २०२० मा चीफ अफ डिफेन्स स्टाफको पदभार ग्रहण गरेका हुन ।
समाचार एजेन्सी एएनआईका अनुसार हेलिकप्टर सुलुर एयरबेसबाट वेलिंगटन जाँदै थियो । नराम्ररी जलेको अवस्थामा फेला परेका शवहरुको पहिचान गर्ने प्रयास भइरहेको छ । पहाड मुनिबाट अझै केही शव देखिन्छन् । सार्वजनिक भएको दुर्घटनाको दृश्यमा हेलिकप्टर पूर्णरुपमा क्षतिग्रस्त र आगो लागेको देखिन्छ ।
