दक्षिण अफ्रिकामा सरकारले देशमा लगाइएको रात्रि कर्फ्यू हटाएको छ । ओमिक्रोन भेरियन्टका कारण देशमा चौथो लहर समाप्त भएको सरकारको विश्वास छ । मन्त्री मण्डली गुंगुबेलेले महामारीको प्रवृत्ति, मुलुकमा खोपको स्तर र स्वास्थ्य क्षेत्रको क्षमतालाई ध्यानमा राखेर यस्तो निर्णय गरिएको जानकारी दिए ।
सरकारले मानिसको आवतजावतमा लगाइएको प्रतिबन्ध हटाउँदै कार्यक्रममा सीमित व्यक्तिलाई मात्रै प्रवेश दिने समेत जनाएको छ । १००० व्यक्तिहरू इनडोर कार्यक्रमहरूमा र २००० व्यक्तिहरू बाहिरी कार्यक्रमहरूमा भाग लिन सक्नेछन् । दक्षिण अफ्रिका अहिले कोरोना अलर्टको तल्लो तहमा छ । बिहीबार बसेको मन्त्रिपरिषद् बैठकपछि सरकारले विज्ञप्ति जारी गर्दै सबै संकेत हेर्दा चौथो लहरको उत्कर्ष सकिएको भन्न सकिने बताएको छ ।
