
तिलक सिंह पेलाको ‘लुकाउन खोज्दा पनि आँशु’ गीत २०५३ सालमा निकै चर्चित बन्यो । रेडियो नेपालबाट उक्त गीत धेरै बज्यो । धेरैका टेपरिकाडमा घन्कीयो । २०५४ सालमा आँशु भाग दुई पनि बजारमा आयो । तर गीत चर्चित भए पनि त्यसपछि गायक भने एकाएक गुमनाम भए । उनी सुदूरपश्चिमबाट पहिलो पटक आधुनिक गीतमा उदाएका थिए । बैतडीबाट भारतको बाटो हुँदै काठमाण्डौ आएर त्यो समयमा गीत रेकर्ड गराउनु सहज पक्कै पनि थिएन ।
आँशु एल्बमको सफलता पछि तिलक सिंह पेला गायनबाट हराएर साधना तर्फ लागे । शाश्त्रिय संगीत सिके । साधनामा तल्लिन भइरहे । २०६१ सालमा काठमाण्डौको बनस्थलीमा ‘श्रीकृष्ण गुरुकुल संगीत पाठशाला’ स्थापना गरे । थुप्रै शिष्यहरु सँग सिकाउँदै सिक्दै संगीतमा अभ्यास गरिरहे, गराइरहे । उनका थुप्रै शिष्यहरु अहिने नेपाली संगीत क्षेत्रमा स्थापित हुदै छन् । उनी भने २३ बर्षको साधना पछि २०७६ सालमा फेरि आँशु भाग तीन मार्फत ‘निर्जन किनार’ ल्याएर आए । उनको त्यो २३ बर्ष पछिको उदय निकै भिन्न थियो ।
अहिले पेलाले एकपछि अर्को गीत ल्याइरहेका छन् । रञ्जित ज्ञवालीको गजल ‘पलपल तिमीलाई’ बजारमा ल्याएको छोटो समयमै डा. प्रदिप मैनालीको ‘के लत बस्यो’ गजलमा पेलाले आफ्नो जादुमय गायिकी प्रस्तुत गरका छन् । यस गजलले फेरि एक पटक नेपाली संगीत प्रेमिलाई तरंगीत बनाएको छ ।
यो गीत रिदम कँडेलले एरेन्ज गरेका छन् । शब्द, संगीत र गायनको संयोजन प्रसंसा योग्य छ । धर्म गन्धर्वको सांरगी, जगन्नाथ धौगोडाको तवला र नगेन्द्र बिक्रम राईले बासुरी बादन गरेका छन् । पियानो रिदम कँडेलले बजाएका छन् । गजलको मिक्सिङ्ग महेश्वरमान राजभण्डारीले गरेका छन् ।
नेपाली गजल गायनको दुनियाँमा यसलाई पछिल्लो समयको उत्कृष्ठ सृजना मान्न सकिन्छ । यसपछि तिलक सिंह पेला डोटेली भाषाको गीत ‘देउसरा आइगै’ लाई शाश्त्रिय संगीतको संयोजन गरेर बजारमा ल्याउदैछन् । अहिले उनी ‘देउसरा आइगै’ नामक उक्त गीतलाई बजारमा ल्याउने तयारीमा जुटेका छन् । गीत रेकडिङ्ग समेत भइसकेको छ ।