nepalom.com

काठमाडौ । सरकारले कोरोना संक्रमण उच्च बन्दै जान थालेपछि धार्मिकस्थलमा नित्य पूजा, ध्यान र प्रार्थना बाहेकका काममा रोक लगाउने निर्णय गरेको छ । सोमबार बसेको मन्त्रिपरिषद बैठकले सिसिएमसीको सिफारिसका आधारमा यस्तो निर्णय गरेको हो । बैठकले त्यस्ता स्थलमा २५ जना भन्दा बढी भेला हुन पनि निषेध गर्ने निर्णय गरेको छ ।

साथै, विवाह व्रतबन्ध लगायतका कार्यक्रममा पनि सो भन्दा बढि सहभागी हुन नमिल्ने गरी आदेश जारी गरेको हो । सरकारको आदेश पालना नगर्नेलाई संक्रामक रोग ऐन २०२० अनुसार कारवाही गर्ने चेतावनी पनि दिएको छ ।
त्यस्तै सरकारले सार्वजनिक सवारी साधनमा क्षमता भन्दा बढि यात्रु राख्न नपाउने निर्णय गरेको छ । सोमबार बसेको मन्त्रिपरिषद बैठकले सार्वजनिक यातायातमा यात्रुले मास्क अनिवार्य लगाउनुपर्ने निर्णय पनि गरेको छ । यदि मास्क नलगाए १० रुपैयाँमा मास्क दिनुपर्ने गर्ने निर्णय गरेको सरकारका प्रवक्ता पार्वत गुरुङले जानकारी दिएका छन् ।

त्यसैगरी गाडीलाई नियमित सेनिटाइज गर्नुपर्ने, मास्क नलगाएकालाई गाडीमा छिर्न नदिने, चालक र सहचालकले पनि अनिवार्य मास्क लगाउनुपर्ने, हवाइ यातायातको हकमा पर्याप्त स्वास्थ्य मापदण्ड अपनाउनुपर्ने निर्णय बैठकले गरेको छ ।